Медицинский отдел Казанской епархии РПЦ

Сайт создан по благословению Архиепископа Казанского и Татарстанского Анастасия.

Телефон Доверия

8 (843) 253-40-35, понедельник-пятница, с 10.00 до 17.00
8 (843) 253-40-35
  Новости
  Библиотека
  
  
  
  
  
  
  
  
  Медицинский Отдел
  
  
  
  
  Помощь в больницах
  Опыт других Епархий
  
  
  
  
  
  Болезнь и Молитва
  Обзор СМИ

Акафист чудотворной иконе Божией Матери, именуемой "Избáвительница".

Кондак 1

Возбрани врагом нашим озлобляти нас и от Господа нашего отлучити конечне, а нас научи пети Тебе весело:

Припев: Радуйся, Избавительнице, от горя, бед и гибели спасающая нас бедствующих.

Икос 1

Ангелов множество по Твоему, Мати наша, повелению, ополчаются на избавление наше грозно. Ты же приими молитву сию:

Радуйся, Ангелов на спасение наше посылающая;

радуйся, Царице горних чинов, небесную их помощь нам дарующая.

Радуйся, Ангелом хранити нас повелевающая;

радуйся, воинством Ангельским врагов наших поражающая.

Радуйся, Избавительнице, от горя, бед и гибели спасающая нас бедствующих.

Кондак 2

Видят бедствующие толикую и многую помощь Твою сердечно Тя призывающим, наставляются тем пети Сыну Твоему непрестанно: Аллилуйя.

Икос 2

Разумеют мнози, яко мирови дарова Тя Сын Твой Избавительницей бедствующих. Темже поем Ти сице:

Радуйся, бедствующих Мати;

радуйся, страждущих утешение.

Радуйся, болящих исцеление;

радуйся, ненадежных надеждо.

Радуйся, Избавительнице, от горя, бед и гибели спасающая нас бедствующих.


Кондак 3

Сила Вышняго даровася Ти на помощь и спасение миру и нас, в бедах погибающих, и кто же Тобою не избавлен бысть и кто же не поет Сыну Твоему: Аллилуйя.

Икос 3

Имущи непостижимую любовь к роду человечу, кии вздохи не прияла еси, кии слезы не отерла еси, и кого не принудила еси призывати Тя, вопиюще:

Радуйся, бедствующих скорое услышание;

радуйся, печальных и скорбных утешение;

Радуйся, погибающих быстрое спасение.

радуйся, плененных свобождение.

Радуйся, Избавительнице, от горя, бед и гибели спасающая нас бедствующих.

Кондак 4

Буря несчастий налете на ны, спаси нас погибающих, Избавительнице наша, бурю погибельную на земле укротившая и приемлющая нашу песнь: Аллилуйя.

Икос 4

Слышаша человечестии роди всю Твою к христианам дивную любовь и Твое мощное избавление от всяких находящих на них лютых, научишася пети Тебе:

Радуйся, человеческаго рода от бед избавление;

радуйся, бурь житейских прекращение.

Радуйся, уныния прогонительнице;

радуйся, радости по скорби нам подательнице.

Радуйся, Избавительнице, от горя, бед и гибели спасающая нас бедствующих.

Кондак 5

Боготечной звезде подобящаяся, мрак и темноту в греховных сердцах разгоняющей, да во свете Твоея любви узрят Господа и воспоют Ему: Аллилуйя.

Икос 5

Видеша люди российстии Твое нечаянное от многоразличных бед избавление, радостно поют Тебе сице:

Радуйся, в бедах наша помощнице;

радуйся, скорбей наших отъятие.

Радуйся, печалей наших отгнание;

радуйся, в скорбех наших утешение.

Радуйся, Избавительнице, от горя, бед и гибели спасающая нас бедствующих.

Кондак 6

Проповедуют помощь Твою и любовь, Мати, исцеленнии, утешеннии, обрадованнии и спасеннии Тобою от бед, и поют Твоему Высокодержавному Сыну: Аллилуйя.

Икос 6

Возсиял еси нам свет спасения во мгле погибели, окружающей нас, и наставил есть пети Тебе:

Радуйся, мглу грехов разгоняющая;

радуйся, мрак души моея просвещающая.

Радуйся, тьму греховную потребляющая;

радуйся, светом радости души ободряющая.

Радуйся, Избавительнице, от горя, бед и гибели спасающая нас бедствующих.

Кондак 7

Хотящим нам конечному отчаянию предатися, отовсюду бедам належащим, помыслихом же о Тебе, Избавительнице, и ободрихомся и утешихомся, поюще Сыну Твоему: Аллилуйя.

Икос 7

Новую и нежданную показа нам милость Свою, под державную руку Твою нас восприявши и отсюда вопием Ти:

Радуйся, Царице державная;

радуйся, и нас под Твою державу восприявшая.

Радуйся, защиту Твою нам даровавшая:

радуйся, врагов наших поразившая.

Радуйся, Избавительнице, от горя, бед и гибели спасающая нас бедствующих.

Кондак 8

Странное чудо на погибель обреченных и в нуждах томящихся безчисленных, внезапу спасение и избавление получают от Тебе, Вселюбящей, поюще Богу: Аллилуйя.

Икос 8

Вси сущии во мраце скорбей, вси, обуреваемые несчастий бурей, приидите к доброму пристанищу и нашему поможению, покрову Девы Избавительницы, вопиюще Ей:

Радуйся, радостей источниче;

радуйся, печалей прогнание.

Радуйся, бед уменьшение;

радуйся, всяческаго покоя подательнице.

Радуйся, Избавительнице, от горя, бед и гибели спасающая нас бедствующих.

Кондак 9

Все существо человеческое хвалит Тя, вси воспевают Тя, многоразличное избавление несущую, вместо печалей радость подающую поющим: Аллилуйя.

Икос 9

Ветия многоумнии обезумеша, видяще Твое быстрое и чудесное от бед страждущих избавление, и умолкоша нам, поющим Ти:

Радуйся, чудесами мир удивившая;

радуйся, чудесами нас укрепившая.

Радуйся, безбожие чудесами истребившая;

радуйся, врагов силою Божией посрамившая.

Радуйся, Избавительнице, от горя, бед и гибели спасающая нас бедствующих.

Кондак 10

Спасти хотя всяку душу человечу, всею любовию печешися о ней, дондеже не научиши ю пети Сыну Твоему: Аллилуйя.

Икос 10

Стеною мир христианский хранящей и всяку душу от врагов ограждающей, явися икона Твоя, Избавительнице, в мире православном, и чудесами прославися, Тебе людем Божиим воспевающим:

Радуйся, наставнице наша, Святую гору Афонскую в жребий себе избравшая;

радуйся, Избавительнице наша, Твоим благословением Новый Афон благословившая.

Радуйся, веселие наше, знамение союза неразрывнаго уделов Своих земных иконою Твоею явившая;

радуйся, вечная радосте наша, чудесным попечением к юной Ново-Афонской обители благоволившая.

Радуйся, Избавительнице, от горя, бед и гибели спасающая нас бедствующих.

Кондак 11

Пение непрестанное приносят Ти Тобою избавленнии и Тобою паки радость обретшии, и Божественному Сыну Твоему поют радостно: Аллилуйя.

Икос 11

Светосияющим светилом лучезарным во мраце греха явися нам Твоя икона, Избавительнице, наставляющая нас пети Тебе:

Радуйся, от глада нас избавляющая;

радуйся, вредоносящее естество от растительного мира отгоняющая.

Радуйся, посевы и леса, и вся растущая от погибели спасающая; радуйся, земледельцев скорбящих утешение и труда их благословение.

Радуйся, Избавительнице, от горя, бед и гибели спасающая нас бедствующих.

Кондак 12

Благодать от иконы Твоея, Избавительнице, текущая, исцелений струи обильно подающая и сердца веселием оживляющая, побеждает всех волею пети Тебе, Мати, Сыну Твоему и Богу: Аллилуйя.

Икос 12

Воспеваем исцеления, воспеваем наипаче воскрешение Анастасия отрока и воспевающе поем:

Радуйся, мертвых воскрешающая;

радуйся, умершая сердца оживляющая.

Радуйся, от смерти и вечнаго огня изыимающая;

радуйся, посмертное наше упование и защито.

Радуйся, Избавительнице, от горя, бед и гибели спасающая нас бедствующих.

Кондак 13

(Этот кондак читается три раза подряд)

О, Всепетая и Вселюбимая наша Мати, умилосердися ныне и помилуй, в лютых и безысходных сущих нас скорбех избавляющи, научи нас сердечно воспевати Богу, прощающему нас: Аллилуйя, аллилуйя, аллилуйя.

Икос 1

Ангелов множество по Твоему, Мати Наша, повелению, ополчаются на избавление наше грозно: Ты же приими молитву сию:

Радуйся, Ангелов на спасение наше посылающая;

радуйся, Царице горних чинов, небесную их помощь нам дарующая.

Радуйся, Ангелом хранити нас повелевающая;

радуйся, воинством Ангельским врагов наших поражающая.

Радуйся, Избавительнице, от горя, бед и гибели спасающая нас бедствующих.

Кондак 1

Возбрани врагом нашим озлобляти нас и от Господа нашего отлучити конечне, а нас научи пети Тебе весело:

Радуйся, Избавительнице, от горя, бед и гибели спасающая нас бедствующих.

Молитва перед иконою Божией Матери, именуемой "Избавительница"

О, Мати Божия, помощь и защито наша, егда попросим, буди Избавительнице наша, на Тя бо уповаем и всегда вседушно Тя призываем: умилосердися и помози, пожалей и избави, приклони ухо Твое и наши скорбныя и слезныя молитвы приими, и, якоже хощеши, успокой и обрадуй нас любящих Твоего Безначального Сына и Бога нашего. Аминь.

Величание.

Величаем, / величаем, Тя, / Пресвятая Дево, / Богоизбранная Отроковице / и чтим образ Твой святый, / имже точиши исцеления / всем с верою притекающим

Тропарь иконе Божией Матери “Избавительница”, глас 4

Избавление приносящая всем от сердца Тя призывающим, / принеси избавление скорое и нам, / в лютых бедах погибающим / и в Тебе Единей избавление наше по Бозе полагающим.

Другой тропарь, глас 4

Яко пресветлая звезда, / просия Божественными чудесы святый Твой образ Избавительницы, / лучами благодати и милосердия Твоего / озарив в нощи скорбей. / Подаждь убо и нам, Всеблагая Дево, / избавление недугов телесных, / спасение и велию милость.

Кондак, глас 4

Ко иконе Твоей, Пресвятая Госпоже, / бедствовавши с верою притекше, / заступлением Твоим избавитися от злых, / но яко Матерь Христа Бога, / и нас свободи от лютых обстояний, временных и вечных / да зовем Ти: / радуйся, Избавительнице от всех бед.